FBI

攻港被集郵　 G.E.M.狂撩 RM金鐘國

韓流呢輪真係頻頻襲港，仲記得兩星期前《 Running Man》主持宋智孝旋風式來港出席聖誕開幕禮，週日（ 1日）《 RM》另一固定主持、大隻佬金鐘國又突襲香港喇。

週日（ 1日）晚灣仔會展舉行「 Yahoo!人氣大獎 2013」，數埋都有唔少大星，林峯、阿 Sa、杜汶澤、周柏豪等都有到，壓軸得獎嘉賓仲搵到喺香港有大堆 fans嘅金鐘國攞「最具號召力韓國主持人」獎添。嗱， FBI唔係偏幫韓國藝人，但佢哋嘅專業態度， FBI都要搵位讚吓，話說當晚大會安排金鐘國晚上 11點出場，但佢當日 9點半前就已經到，比起香港好多藝人準時。等上台期間，金鐘國不斷被在場人士要求「集郵」，包括 G.E.M.同周秀娜，金鐘國都有求必應冇 say no。
到晚上 11點，金鐘國終於等到上台，上到台未見觀眾佢已經笑定先，之後就算佢唔明主持森美講咩都好，翻譯員翻譯緊都好，佢都掛住招牌笑容。去到祝酒部分，勁識做嘅國館長仲自動波同身邊嘅謝安琪、陳柏宇碰杯，最令 FBI佩服，係佢等到全台人走晒，都仲留喺台上同觀眾揮手道別，事出必有因，愈來愈多韓星被品牌請來香港同港星爭飯碗，大家明點解啦？

估唔到金鐘國都識得 G.E.M.，仲鼓勵 G.E.M.要繼續努力添。查實「繼續努力」呢 4個字用喺識唔識嘅人都一樣 work，金鐘國醒呀！ 

金鐘國喺 RM搞慣笑，呢啲笑到瞇晒眼嘅甫士自然難佢唔到，全晚由頭笑到尾。 

超 deep V娜姐巧遇金鐘國，走唔甩當然要集吓郵先啦。

當晚 G.E.M.連攞三獎，「人氣 MV」、「人氣演唱會」、「人氣國語歌曲」，預演年尾頒獎禮？ 

攞到「人氣合唱歌」嘅彭家麗，當晚專登搵咗個臨時演員扮走音李主席齊齊唱〈從不喜歡孤單一個〉，笑爆嘴！而呢位 A貨李主席，更學足走音腔添！ 

峯峯呢晚條西褲好窄，一坐低就「現形」，小心紥實個「蛋」影響健康呀！

撰文、攝影： FBI

(繼續閱讀...)